जामनेर प्रतिनिधी | जळगाव जिल्ह्यातील सातगाव डोंगरी परिसरात दुचाकी आणि मालवाहू ट्रक यांच्यात झालेल्या भीषण अपघातप्रकरणी पहूर पोलिसांनी ट्रकचालकाविरुद्ध गुन्हा दाखल केला आहे. या अपघातात राजू बाबूलाल परदेशी (वय ५३) आणि विमलबाई ओंकार परदेशी (वय ६८), दोघेही रा. सातगाव डोंगरी, ता. पाचोरा, यांचा मृत्यू झाल्याची नोंद पोलिसांच्या कागदपत्रात करण्यात आली आहे.
पोलिसांनी दिलेल्या माहितीनुसार, २३ सप्टेंबर २०२६ रोजी रात्री सुमारे १० वाजण्याच्या सुमारास शेंदुर्णी ते पहूर मार्गावर घोडेस्वारबाबा मंदिराजवळ हा अपघात घडला. यावेळी मालवाहू ट्रक क्रमांक MH-18-BZ-4408 वरील चालक दीपक गोविंदा शिंदे (रा. बिलवाडी, ता. जामनेर) याने वाहन चालवताना दुचाकीला धडक दिल्याचा आरोप आहे.
या धडकेत दुचाकीवरील दोघांना गंभीर दुखापत झाली. त्यात त्यांचा मृत्यू झाला, तसेच वाहनांचे नुकसान झाले. घटनेनंतर या प्रकरणाची नोंद पहूर पोलीस स्टेशनमध्ये करण्यात आली. भारतीय न्याय संहितेतील संबंधित कलमांनुसार ट्रकचालकाविरुद्ध गुन्हा दाखल करण्यात आला आहे.
या प्रकरणाचा पुढील तपास सहाय्यक पोलीस निरीक्षक प्रवीण दातरे यांच्या मार्गदर्शनाखाली सुरू आहे. अपघात नेमका कशामुळे घडला, याबाबत तपासातून अधिक माहिती समोर येण्याची शक्यता आहे.
